WANAWAKE WA GEITA: NGOME YA USHINDI WA DKT. SAMIA

Na Victor Bariety;

19 Septemba, 2025

Jua lilipokuwa likielekea magharibi, mitaa ya Geita mjini ilihisi moto wa hamasa. Wanawake kutoka kata mbalimbali walifurika Ukumbi wa Golden Social Hall, wakivalia vitambaa vya kijani na njano, rangi zinazobeba heshima na historia ya Chama Cha Mapinduzi (CCM). Huo ulikuwa mkutano wa ndani wa UWT, lakini hamasa iliyotanda ilionekana kuzidi mipaka ya chama ilikuwa ni sherehe ya mshikamano wa wanawake na kiongozi wao, Dkt. Samia Suluhu Hassan.

Mwenyekiti wa UWT Taifa ameongoza msafara wa viongozi wa UWT na CCM. Alipowasili ukumbini, vigelegele, nderemo na nyimbo za hamasa zilisikika: “Mama Samia ni jembe, Mama Samia ni mshindi!” Wanawake wa Geita walikuwa tayari kusikia, kujifunza na kuapa.

Mwenyekiti: Wanawake ndio silaha ya ushindi

Akiwa amesimama mbele ya hadhira iliyojaa matumaini, mwenyekiti hakupoteza muda. Kwa sauti ya uthabiti na msisitizo, alieleza:

“Wanawake wa Geita, ninyi ndio silaha ya ushindi. Kila kura yenu ni nanga ya maendeleo, ni ngao ya mshindi wetu Dkt. Samia. Tukisimama pamoja, hakuna anayeweza kutuzuia.”

Maneno haya yaliamsha msisimko. Ukumbi mzima ulilipuka kwa makofi na nyimbo, wanawake wakikubali kwa kauli moja kuwa Oktoba 29 si tarehe ya kawaida, bali ni siku ya kuandika historia mpya ya ushindi wa CCM.

Samia katika mioyo ya Wanawake

Mkutano huu ulifanyika katika mkoa ambao historia yake ya kisiasa imejaa msisimko wa siasa za ushindani. Lakini leo, taswira ilikuwa wazi: wanawake wameamua kumsimamia Rais wao.

Miongoni mwa waliotoa hisia, mwanamke mmoja kutoka kata ya kalangalala aliongea kwa ushuhuda wa maisha ya kila siku: “Mama Samia ametufungulia milango ya fursa. Soko letu limeboreshwa, huduma za afya zimeimarika, na miradi ya maji inaendelea. Tunachohitaji sasa ni kumlipa kwa kura. Hii siyo ahadi, ni kiapo.”

Kauli hiyo ilipokelewa kwa shangwe, akionesha wazi kwamba ujumbe wa maendeleo umeingia hadi kwenye kaya za wakulima, wavuvi na wafanyabiashara wadogo.

Kura ya mwanamke ni kura ya familia, Mwenyekiti alikumbusha jambo moja la msingi: kura ya mwanamke haibebi sauti ya mtu mmoja, bali ya familia nzima. “Mwanamke akiamua, anaamua na familia yake. Tukishirikiana na waume zetu, vijana wetu na wazee, tunaweza kuhakikisha Geita inakuwa ngome ya ushindi wa CCM. Tusiache hata kura moja ipotee.”

Huu ulikuwa mwaliko wa vitendo: wanawake waliwekwa kama mabalozi wa hamasa majumbani, sokoni, mashambani na hata kwenye mikusanyiko ya kijamii—wakishiriki kuchochea msukumo wa kura kwa ajili ya Rais na wagombea wa CCM kuanzia madiwani hadi wabunge.

Sauti za wananchi: imani kwa kiongozi wa taifa

Mkutano haukuwa tu wa chama; ulikuwa jukwaa la wananchi wa kawaida kueleza imani yao kwa Rais. Mwananchi mmoja aliyehudhuria aliongea kwa nia ya dhati:

“Tunaamini Dkt. Samia ni kiongozi wa vitendo—amejitoa kutetea maslahi ya wananchi wa kawaida, amefungua fursa kwa vijana, na ameweka mazingira ya amani. Ni wajibu wetu kumrudisha madarakani.”

Kauli kama hizi ziliunua ari ndani ya ukumbi na kuonyesha kwamba uamuzi wa wengi hauko tu kwa maneno ya kampeni, bali ni ushuhuda wa mabadiliko yaliyoshuhudiwa kila siku.

Maendeleo hayana chama—lakini mshindi anaonekana

Mwenyekiti alisisitiza wazi kwamba maendeleo yanayoonekana sasa hayabegi nembo ya chama—hata hivyo, aliweka wazi kuwa ni muhimu kumpa kipaumbele kiongozi aliyeleta maendeleo hayo.

“Maendeleo hayana chama. Barabara inapojengwa, shule ikijengwa, zahanati ikiboreshwa—hakuna anayechagua chama. Lakini ni lazima tukumbuke: mshindi halisi wa maendeleo haya ni CCM na kiongozi wetu.”

Kauli hii ilitoa mwaliko kwa kila mwananchi wa Geita, hata wasio wanachama, kuchukua nafasi yao ya kubweka mustakabali wa maendeleo kwa njia ya kidemokrasia Oktoba 29.

Hitimisho: Geita imeweka historia

Mkutano wa wanawake wa Geita umeacha alama ya dhahabu. Wanawake wa CCM kupitia UWT wamesimama imara na kuapa kumlinda mshindi wao. Oktoba 29 sasa inatazamwa kama siku ya ushindi wa kishindo, ambapo kura za wanawake zitakuwa ngao na jembe la kumrudisha kiongozi aliyetoa matendo—pamoja na madiwani na wabunge wote wa CCM.