TAKUKURU YAONGOZA MAPAMBANO DHIDI YA RUSHWA SADC, YATANGAZA HATARI ZA RUSHWA KATIKA MISAADA YA DHARURA.

Na Theresia C Method,

Lusaka, Zambia-Oktoba 2, 2024: Tanzania kupitia Taasisi ya Kuzuia na Kupambana na Rushwa (TAKUKURU), imechukua uongozi wa mapambano dhidi ya rushwa katika ukanda wa SADC, ikiwa ni mara ya pili kushika nafasi hiyo muhimu. Katika hotuba yake ya uzinduzi wa  mkutano wa mwaka wa wakuu wa mamlaka za kupambana na rushwa kwa nchi za SADC, Mkurugenzi Mkuu wa TAKUKURU, Crispin Francis Chalalima, ambaye pia ni mwenyekiti mpya wa kamati ya SADC ya kupambana na rushwa (SACC), ametahadharisha kuhusu hatari kubwa ya rushwa katika utoaji wa misaada wakati wa dharura.

Chalamila ameeleza kuwa majanga ya dharura kama vile mlipuko wa magonjwa na athari za mabadiliko ya tabia nchi yanaweza kufungua milango ya rushwa katika hatua mbalimbali za ugawaji misaada, ikiwa ni pamoja na udanganyifu, ubadhirifu wa mali, na ukiukwaji wa maadili ya ununuzi. “Mchakato wa utoaji misaada upo katika hatari kubwa ya kudhibitiwa na rushwa kwa sababu ya haraka na udharura wa hali zinazokuwepo,” alisema Chalamila, huku akiongeza kuwa pia kunaweza kutokea matumizi mabaya ya ngono (sextortion) kama mojawapo ya aina za rushwa zinazoweza kutokea.

Mkurugenzi Mkuu wa TAKUKURU, Crispin Francis Chalalima, ambaye pia ni mwenyekiti mpya wa kamati ya SADC ya kupambana na rushwa (SACC), 

Mkutano huo, ukiwa na kaulimbiu: "Kuimarisha mapambano dhidi ya rushwa katika usimamizi wa majanga na huduma za magereza katika ukanda wa SADC", umeangazia changamoto zinazokabili nchi wanachama wa SADC katika kukabiliana na rushwa wakati wa kushughulikia dharura. Chalamila alisisitiza umuhimu wa mikakati imara ya kanda ili kuhakikisha misaada inafika kwa walengwa kwa uadilifu na uwazi.

Aidha, Chalamila alimpongeza Mwenyekiti aliyemaliza muda wake, Monica Chipanta Mwansa wa Zambia, kwa uongozi wake imara katika kutekeleza mpango mkakati wa SADC wa kupambana na rushwa (2023-2027), ambao umejikita katika kuimarisha ushirikiano wa kikanda na kuongeza uwajibikaji katika usimamizi wa misaada na majanga.

Mkutano huo wa siku tatu, uliofanyika jijini Lusaka, umehudhuriwa na wawakilishi kutoka nchi 14 wanachama wa SADC, huku Tanzania ikiongoza mapambano hayo kwa mara ya pili baada ya kuwa mwenyekiti mwaka 2017/2018. TAKUKURU inatarajiwa kuendelea na juhudi hizi kwa mwaka wa 2024/2025, ikiwa mstari wa mbele katika kuhakikisha ukanda wa SADC unakuwa na mazingira safi na huru dhidi ya vitendo vya rushwa.

Picha ya pamoja: Wakuu wa Mamlaka za Kupambana na Rushwa ukanda wa  SADC pamoja na viongozi na wajumbe mbalimbali kutoka nchi 14.

 Mwisho