VIONGOZI WA VYAMA VYA SIASA GEITA WASISITIZWA KUZINGATIA SHERIA ZA UCHAGUZI WA SERIKALI ZA MITAA

Na Theresia C Method:

Msimamizi wa uchaguzi wa jimbo la Geita Mjini, Bw. Yefred Myenzi, ametoa wito kwa viongozi wa vyama vya siasa kuhakikisha wanaheshimu sheria, kanuni, na miongozo ya uchaguzi ili kuhakikisha kampeni na uchaguzi wa serikali za mitaa mwaka huu vinafanyika kwa uwazi, haki, na amani.

Katika mahojiano na GPC blog, Bw. Myenzi alisisitiza umuhimu wa ushirikiano kati ya vyama vya siasa na maafisa wa uchaguzi. Alionya dhidi ya matumizi ya lugha za matusi au uchochezi katika kipindi hiki cha kampeni. Kampeni hizo zitaanza rasmi kesho, Novemba 20, na kuendelea hadi Novemba 26, 2024, kabla ya uchaguzi kufanyika Novemba 27, 2024.

"Tunapokaribia kuanza kampeni, tunatarajia viongozi wa vyama vya siasa na wagombea wao kufuata sheria, kutoa hoja za msingi, na kuepuka lugha ya kuchochea au kuchafua wapinzani. Hii ni nafasi ya kuwahamasisha wananchi kwa amani," alisema Bw. Myenzi.

Bw. Myenzi pia alifafanua kuhusu rufaa zilizowasilishwa ofisini kwake. Alisema jumla ya rufaa 57 ziliwasilishwa na Chama cha Demokrasia na Maendeleo (CHADEMA), ambapo 56 zilikubaliwa na moja ikakataliwa. Aidha, rufaa moja kutoka ACT Wazalendo na nyingine kutoka CUF zote zilipitishwa.

"Tumeshughulikia rufaa kwa haki na kwa kuzingatia sheria za uchaguzi. Tumehakikisha kila mgombea mwenye sifa anapata nafasi ya kushiriki uchaguzi huu," alisema Bw. Myenzi, ambaye pia ni Mkurugenzi wa Halmashauri ya Mji wa Geita.

Akizungumzia imani potofu iliyoenea kwa baadhi ya wananchi kuhusu matokeo ya uchaguzi, Bw. Myenzi alisisitiza kuwa kura za wananchi ndizo zinazoamua matokeo.

"Hakuna sababu ya kuwa na shaka. Kura zako zina nguvu. Jitokeze kwa wingi kupiga kura siku ya uchaguzi ili kuwachagua viongozi wa serikali za mitaa mnaowaamini," alisema Myenzi.

Bw. Myenzi amesisitiza umuhimu wa kudumisha amani wakati wa mchakato wa uchaguzi. Amehimiza viongozi wa vyama vya siasa kuonyesha ukomavu wa kisiasa kwa kuepuka vitendo vyovyote vinavyoweza kuvuruga utulivu wa jimbo hilo.

"Demokrasia imara inajengwa na watu wenye nidhamu na uwajibikaji. Ni jukumu letu wote kuhakikisha uchaguzi huu unakuwa wa kihistoria kwa kuwa huru, haki, na wa amani," alihitimisha.

 

Msimamizi wa uchaguzi wa jimbo la Geita Mjini, ambaye pia ni Mkurugenzi wa Halmashauri ya Mji wa Geita  Bw. Yefred Myenzi, akizungumza na GPC blog. 

Mwisho.