Na mwandishi wetu;
Mwenyekiti wa Chama Cha Mapinduzi
(CCM) Mkoa wa Geita, Nikolaus Kasendamila, amewataka wagombea na wanachama wa
chama hicho waliokuwa wakihusishwa na mchakato wa kuwania nafasi za udiwani
katika Jimbo la Busanda kuweka pembeni makovu na vinyongo vilivyotokana na kura
za maoni, na kuelekeza nguvu katika kutafuta kura za ushindi kwa wagombea wa
CCM.
Akizungumza katika kikao maalum
kilichofanyika kata ya Nyarugusu, Kasendamila amesema anakiri kuwepo kwa
mikwaruzano na mipashano miongoni mwa wanachama wakati wa mchakato wa ndani wa
uteuzi, lakini akasisitiza kuwa sasa ni wakati wa umoja na mshikamano ili
kuhakikisha chama kinashinda kwa kishindo.
"Ninatambua kulikuwa na
sintofahamu na mikwaruzano kwenye baadhi ya kata, lakini hayo yamepita.
Tunachotakiwa sasa ni kuelekeza nguvu zetu kwenye kutafuta kura kwa wagombea wa
CCM madiwani, mbunge, na mgombea urais Dkt. Samia Suluhu Hassan,"
amesema Kasendamila.
Amesisitiza kuwa kwa kazi kubwa
iliyofanywa na Rais Dkt. Samia katika awamu hii, hakuna sababu ya CCM
kutoshinda kwa kishindo, na hivyo ni wajibu wa viongozi wa chama, madiwani, na
wabunge kuhakikisha ushindi huo unapatikana kwa ushirikiano na umoja.
"Kwa kazi iliyofanyika awamu hii ya Dkt. Samia, hakuna sababu ya kutoshinda kwa kishindo,Hii ni dhamana yetu sote kuhakikisha ushindi huu unapatikana na CCM tuwaeleze wananchi ilani iliyopita ilitekelezaje miradi na inayokuja inakwenda kufanya nini" Kasendamila
PICHA ZAIDI
0 Comments