NYANG’HWALE YATAPIKA MIRADI YA MAENDELEO

Na Victor Bariety, Geita;

Picha: Mgombea Ubunge Jimbo la Nyang'hwale Hussein Amar Kassu na mgombea Udiwani kata ya Nyijundu wakiomba kura kwa wananchi wa Nyijundu

(Takwimu zimerejewa kutoka hotuba ya Mgombea Ubunge wa Jimbo la Nyang’hwale, Hussein Amar Kassu, aliyekuwa akisoma kutoka kitabu cha Ilani ya CCM 2020–2025.)

Wakati mwingine, maendeleo hayahitaji kelele yanahitaji ushahidi.Na leo, ushahidi huo una jina moja: Nyang’hwale.Wapo waliodhani Nyang’hwale itabaki kuwa hadithi ya nyuma ya dunia kijiji cha vumbi, mashimo ya dhahabu, na matumaini yaliyokufa.

Leo, historia imebadilika.

Nyang’hwale imevaa suruali ya maendeleo, imevaa viatu vya kazi, na imeinua uso wake mbele ya Tanzania nzima kwa kusema:

“TULITOKA MBALI, TUMEFIKA MBALI ZAIDI, NA TUNAENDA MBALI KULIKO WOTE.”

2020: NYANG’WALE YA MACHOZI NA VUMBI

Miaka mitano tu nyuma, kulikuwa na sekondari 11 pekee katika jimbo lote.

Watoto walitembea zaidi ya kilomita kumi kufika shuleni.

Zahanati 15 ndizo zilikuwa tegemeo la wananchi zaidi ya laki moja.

Maji yalikuwa neema ya msimu.

Umeme ulikuwa ndoto ya mbali.

Na mama mjamzito alikuwa akihesabu hatima yake kwa moyo wa hofu, maana hospitali ya wilaya haikuwepo.

Barabara zilikuwa majeraha ya udongo; magari yakizama, wagonjwa wakikosa msaada, na ndoto zikisalia majina tu kwenye kampeni.

Picha: Naibu Katibu Mkuu UVCCM Taifa Mussa Mwakitinya (Mjumbe wa Halmashauri Kuu Ya CCM Taifa) akimnadi mgombea ubunge Jimbo la Nyang'hwale Hussein Amar Kassu

2025: NYANG’HWALE INAINUKA KAMA ASUBUHI YA TUMAINI

Kati ya vumbi na jua kali, sasa inasimama Nyang’hwale mpya inayotembea kwa miguu ya maendeleo na kupumua kwa mapafu ya matumaini.

Kati ya mwaka 2020 na 2025, kwa mujibu wa Mbunge Hussein Amar Kassu, akirejea takwimu za Ilani ya CCM:

Sekondari zimeongezeka kutoka 11 hadi 20.

Shule za msingi kutoka 67 hadi 74.

Madarasa kutoka 715 hadi 1,003.

Nyumba za walimu zimeongezeka kutoka 370 hadi 389.

Maabara zimepanda kutoka 21 hadi 41.

Mabweni kutoka 4 hadi 10.

Elimu bure imegharimiwa kwa zaidi ya shilingi bilioni 19.

Huko Kakola, chuo cha VETA kimejengwa — kielelezo cha uamuzi wa Rais Samia Suluhu Hassan wa kuwapa vijana silaha ya maarifa badala ya maneno.

Mwandishi wa makala hii alikutana na Lydia Kisinza, mkazi wa Nyijundu, machozi yakimlenga:

“Tulikuwa tunaamka alfajiri, watoto wanatembea mbali. Leo shule ipo karibu, walimu wako, maji yapo, umeme unawaka. Mungu ambariki Mama Samia na CCM.”

AFYA YANYWA HEWA YA UHAI

Zamani, mama mjamzito alipoumwa, safari yake ya kwenda kujifungua ilikuwa vita.

Leo, Nyang’hwale ina hospitali ya wilaya mpya kabisa.

Zahanati zimeongezeka kutoka 15 hadi 35, na vituo vya afya sasa ni 4.

Kwa mara ya kwanza, kituo cha afya Busolwa kimepewa zaidi ya shilingi milioni 250 kukamilisha ujenzi.

Upatikanaji wa dawa umeongezeka kutoka asilimia 75 hadi 85, na vifo vya kina mama wakati wa kujifungua vimepungua kutoka 12 hadi 9 kati ya 100.

Hii ni kwa sababu sasa huduma zipo karibu, barabara zinapitika, na maisha yamepata thamani.

Kama anavyosema Mbunge Hussein Amar Kassu:

“Huu ni ushahidi wa kazi, si propaganda. Tumeacha historia ya maumivu, sasa tunaandika historia ya matokeo.”

MAJI, UMEME NA BARABARA: NGUVU YA KAZI, MIZIZI YA MAISHA

Maji safi yameongezeka kutoka asilimia 39 hadi 77 bomba kila kijiji, tenki kila kata.

Serikali inalenga kufikisha maji kwa asilimia 100 ifikapo mwaka 2030.

Vijiji 62 tayari vinawaka umeme, wachimbaji 114 wa madini wameunganishiwa umeme, mashine zinawashwa mchana na usiku.

Barabara zinazopita kwa urahisi zimeongezeka kutoka kilomita 105 hadi 355, makaravati kutoka 222 hadi 495, na taa za barabarani zimeshika mji wa Kharumwa usiku kucha.

Kwa miaka mitano ijayo, ilani imeelekeza:

Barabara ya Kahama-Nyang’hwale-Busisi (Mwanza) kujengwa kwa kiwango cha lami.

Barabara za Kharumwa–Kakola na Nyaruguguna–Geita nazo kuwa lami.

Barabara za ndani za vijiji kufungwa kwa changarawe kilomita 288.

Haya yote ni matokeo ya kazi, si bahati.

SAUTI ZA WANANCHI: “HATUJENGI MANENO, TUNAJENGA MAENDELEO”

Jumane Sabuni, mchimbaji mdogo wa dhahabu, anasema kwa sauti yenye nguvu:

“Tukiandamana tutapoteza amani. Tukiweka tiki tunapata maendeleo. Maandamano hayaleti umeme, hayajengi shule. CCM imetuonyesha njia, kazi yetu ni kutiki.”

Kauli hiyo imekuwa wimbo wa Nyang’wale.

Watu hawasubiri kuambiwa wanajua. Wameona kwa macho yao, wameshika kwa mikono yao, wamehisi kwa maisha yao.

MUSSA MWAKITINYA: “AMANI NI MBONI YA MACHO YETU”

Mgeni rasmi wa mkutano, Naibu Katibu Mkuu wa UVCCM Taifa, Ndugu Mussa Mwakitinya, aliwasha moto wa uzalendo:

“Chungeni amani kama mboni za macho yenu. Amani ndiyo mama wa maendeleo. Tukitiki CCM, tunatiki kazi, tunatiki elimu, tunatiki afya, tunatiki taifa lenye heshima.”

Akaongeza kwa msisitizo:

“Mama Samia ameamua kumwangalia kijana wa Nyang’wale, mama wa Nyang’wale na familia ya Nyang’wale. Mikopo bila riba ni ishara ya upendo wa kweli.”